Minning

 

Ein af heiðursfélagskonum  Kvenfélagsins Sifjar er nú látin.  

Jóna Jóhanna Þórðardóttir fædd í Haga á Barðaströnd  þ. 4. janúar 1920  lést þ. 9. september s.l. á Heilbrigðisstofnun Patreksfjarðar.

Jóhanna eins og hún var oftar nefnd,  lét sér annt um samfélagið og studdi það dyggilega m.a. með ötulu starfi  í  félögum á Patreksfirði.  Kvenfélagið Sif naut krafta  hennar um langt árabil en hún gekk í félagið í júní 1964.  Jóhanna hugsaði hlýlega til samferðafólks síns, þar með okkar í Kvenfélaginu Sif.  Kom hugur hennar glögglega  í ljós  þegar hún hin síðari ár hafði ekki tök á að koma til árlegs þorrablóts  en lét skila til okkar og annarra gesta kveðju sem komið var á framfæri af formanni félagsins.

Stjórn Kvenfélagsins Sifjar og aðrar félagskonur þakka Jónu Jóhönnu Þórðardóttur langa og góða samfylgd  og  óeigingjarnt starf.  Börnum hennar og öðrum aðstandendum eru sendar samúðarkveðjur.  

Blessuð sé minning Jónu Jóhönnu Þórðardóttur.

                                                

Stjórn Kvenfélagsins Sifjar á Patreksfirði.

 

 

 

 

 

 

Aðalfundur SVK 2011

 

Samband Vestfirskra kvenna heldur aðalfund sinn n.k. laugardag 10. september.  Gestgjafar fundarins verða að þessu sinni félagskonur í Kvenfélaginu Brautinni  í Bolungarvík,  en til gaman má geta þess að félagið fagnar 100 ára afmælil á árinu.

Utan hefðbundinna aðalfundarstarfa verður farið í skoðunarferð, hlustað á fyrirlestur og loks borða konur saman hátíðarkvöldverð í nýuppgerðu og glæsilegu félagsheimili þeirra Bolvíkinga.