Af jólamarkaði.

Jólamarkaður Slysavarnardeildarinnar Unnar var haldinn í F.H.P laugardaginn 21. nóvember.  Skipulag hans er með þeim hætti að deildin leigir út pláss sem margir nýta sér  þ.á. m við Kvenfélagskonur sem seldum þarna  kleinur, rúgbrauð og heimagert konfekt svo fátt eitt sé talið. 

Fjölmargir söluaðilar voru á staðnum og sumir  langt að komnir.  Fólk leggur metnað í að bjóða fram fallega vöru framleidda af listfengi og natni.

Slysavarnardeildin Unnur sem hefur umsjón með markaðnum selur svo heitt kakó og vöfflur, er með kökubasar og happdrætti.  Þessi markaður þeirra Slysavarnardeildarkvenna er orðin áralöng hefð þar sem  skapast hin skemmtilegasta stemming.  Flestir finna eitthvað við sitt hæfi og það er örugglega  margt sem ratar í jólapakkana og jafnvel á jólaborðið þetta árið eins og ævinlega.

Hér að neðan má sjá hluta af söluvörum okkar Sifjarkvenna.

 

Hvernig er best að ná blettum úr fötum ?

Oft erum við í vandræðum með  að ná hinum og þessum blettum úr fötum.  Gefumst jafnvel alveg upp og dæmum fötin  ónýt. 

Á vef Leiðbeiningarstöðvar heimilanna er mikið af upplýsingum sem hægt er að nýta sér og þar á meðal góð ráð í glímunni við blettina.

Hér má komast inná vefinn og smellið hér til að komast beint á ráðin við blettunum.

M A T A R B I N G Ó

 

Hjálparsjóður Kvenfélagsins Sifjar heldur hið árlega matarbingó í Félagsheimili Patreksfjarðar

sunnudaginn 8. nóvember kl. 14:00.

Fjöldi góðra vinninga.

Mætum öll og styðjum gott málefni.

Saumafundur 2. nóvember.

Fyrsti saumafundur vetrarins verður mánudagskvöldið

2. nóvember kl. 20:30.

Að þessu sinni verður fundurinn í fundarsal Félagsheimilisins.

Sjáumst hressar og kátar

Nefndin.

Fljótlegt og þægilegt

 

Nú hefur nýjum tengli verið bætt við hér efst á síðunni til hægri.  Þar finnum við vetrardagskrána, allt

um  íbúðina okkar  " Björkina" og hugsanlega fleira gagnlegt þegar fram líða stundir. 

Sem fyrr eru allar  hugmyndir um efni á síðuna okkar vel þegnar.

Kærar þakkir til ykkar sem hafið kvittað í gestabókina   

H A U S T F U N D U R

Fyrsti fundur haustsins verður haldinn í Sjóræningjahúsinu laugardagskvöldið 24. október. Guðdómlegar kræsingar verða á borðum og andlega fóðrið á sínum stað, sannkallaður skemmtifundur.

Sjáumst hressar og kátar á laugardagskvöldið ásamt gestum okkar

Nefndin

 

 

Dagskrá Kvenfélagsins Sifjar veturinn 2009/2010

Stjórn Kvenfélagsins Sifjar hefur sett niður dagskrá vetrarins.  Á fundum  er  briddað er uppá ýmsu óvæntu, fróðlegu og  skemmtilegu.  Hver fundur er  auglýstur sérstaklega og við hvetjum áhugasamar konur til að slást í hópinn.

Dagskráin er sem hér segir:

 

 

Kvenfélagið Sif.

starfsárið 2009-2010

Nú þegar vetur gengur í garð þá tökum við höndum saman og mætum hressar og kátar til að takast á við verkefni vetrarins. Dagskráin hljóðar svo:

 

  24. október                    skemmtifundur m/maka eða gesti

  2. nóvember                  saumafundur

  8. nóvember                   bingó  hjálparsjóðsins

 14. nóvember                  laufabrauðsfundur

  7. desember                   saumafundur

 11. janúar                       saumafundur

 23. janúar                       þorrablót

  1. febrúar                     skemmtifundur

 17. febrúar                     aðalfundur

  1. mars                        saumafundur

      ?                              páskabingó

 12. apríl                        saumafundur

 10. mai                        lokafundur

 

Allir almennir fundir verða að Bjarkargötu 7,  nema að annað sé auglýst, en stærri fundir í félagsheimilinu eins og verið hefur.

Opið verður í Björkinni húsi félagsins á miðvikudögum  frá kl.  16:00 -18:00  eins og síðastliðinn vetur,  þá geta konur mætt, skrafað og unnið, því maður er manns gaman.  

 

Með félagskveðju

Stjórnin.

           

                           

Samband Vestfirskra kvenna

heldur aðalfund sinn laugardaginn 5. september.

Að þessu sinni er það Kvenfélagið Sunna sem er gestgjafi fundarins og er hann haldinn í Heydal í Mjóafirði við Ísafjarðardjúp.  

Sambandið (S.V.K.) er aðili að Kvenfélagasambandi Íslands og því einnig í Húsmæðrasambandi Norðurlanda/Alþjóðasambandi dreifbýliskvenna (ACWW).  Deildir innan S.V.K eru kvenfélögin í Ísafjarðarsýslum og V-Barðastrandarsýslu.  Megin tilgangur S.V.K er m.a. að efla og auka samvinnu kvenna á sambandssvæðinu, standa vörð um hag heimilanna og einnig sá  að vinna að hverskonar þjóðnytja og menningarmálum sem samþykkt er gerð um á Sambandsfundum.

Formaður Sambands Vestfirskra kvenna er Helga Dóra Kristjánsdóttir.

 

"Björkin" íbúð Kvenfélagsins að Bjarkargötu 7.

Eins og áður hefur komið fram er á efri hæð hússins við Bjarkargötu 7,  íbúðin okkar "Björkin" .

Íbúðin  hefur tekið nokkrum stakkaskiptum, baðherbergið t.d endurnýjað frá A-Ö, breytingar gerðar á eldhúsi svo eitthvað sé nefnt.  Við höfum notið velvildar og aðstoðar bæði hvað varðar vinnu og við öflun nauðsynlegra hluta.  

Þarna fer fram hefðbundið félagsstarf sem er helst yfir vetrartímann en þess utan er íbúðin lánuð út til gistingar.   Allar nánari upplýsingar um íbúðina veita:

 Elsa Nína s.8251120

Jensína s. 8974700

Anna s. 8953004

Fleiri myndir eru í albúmi.

 

 

 

 

 

 

 

 

Ferð í Flókalund á Kvenréttindadaginn 19. júní.

Þann 19. Júní  ætla konur frá Bíldudal,  Tálknafirði, Barðaströnd og Patreksfirði að  koma saman í Flókalundi í tilefni Kvenréttindadagsins, og eiga saman  skemmtilega stund yfir góðum málsverði.

 

Matseðill kvöldsins:

Forréttur:            Grafin gæs

Aðalréttur:         Pörusteik

Eftirréttur:         Súkkulaðimús.

 

Verðið er kr. 4.900,-

Þær sem vilja skrá sig verða að tilkynna það fyrir 12 júní  í síma 456-1512 eða 8492429 eða senda mér mail.

Gaman væri að sjá sem flestar

Sigríður Ólafsdóttir, formaður Kvenfélagsins Sifjar.

Þann 19. júní 1915 staðfesti konungur samþykkt til Alþingis um kosningarétt kvenna.  Æ síðan hafa samtök kvenna minnst þessa dags og þar með konur af sunnanverðum Vestfjörðum sem hafa í mörg ár hist og gert sér glaðan dag.