Opið hús 19. nóv

Munið opið hús miðvikudaginn 19. nóv.

 

Kvenfélögin eiga að sækja fram !

Skyldu Kvenfélögin ekki bara eiga eftir að koma sterk inn í nánustu framtíð ?  Sjáið  þessa frétt á bb.is sem segir af aðferð Hlífarkvenna á Ísafirði til að auka við félagatalið.

Kvenfélögin hafa allt til að bera til að sækja fram.  Félagskonur búa yfir miklum hæfileikum og fróðleik sem nýtist vel á öllum sviðum

Opið hús

Konfektgerðin

Við hittumst á Bjarkargötunni á mánudagskvöldið var og vorum í miklu konfektstuði.  Kvöldið var skemmtilegt og afraksturinn bara heill hellingur af flottum molum.  Elsa Nína og Esther komu svo með konfekt að heiman sem við smökkuðum á og urðum auðvitað ólmar í að fá uppskriftir. 

Hér er brot af molunum sem við gerðum nýkomnir úr súkkulaðihjúpun

Guðný setti myndir í myndaalbúm af þorrablóti og fl. - endilega kíkið.

 

Mánudagurinn 10. nóv.

Eins og auglýst hefur verið  verður konfektgerð aðalmálið í kvöld á Bjarkargötu 7, -  vanti ykkur frekari upplýsingar má leita þeirra hjá t.d Sigríði Sig, form. eða Elsu Nínu. 

Mér skilst að það eina sem við mætum með sé góða skapið

Myndir - Fyrsti fundur vetrar 2008-2009

Birna Mjöll tók myndir á fyrsta vetrarfundinum okkar sem var haldinn í Sjóræningjahúsinu.  Hér er smá sýnishorn úr þessari vel heppnuðu veislu sem alls 40 manns sóttu þar á meðal heiðursfélagar á staðnum, þær Guðrún Halldórsdóttir og Lilja Jónsdóttir. Smellið á myndirnar til að stækka.

Enginn var svikinn af veitingunum þetta kvöld

Esther lumaði á ýmsu skondnu - alveg óborganleg

Ingveldur fer sömuleiðis létt með að kitla hláturtaugarnar

Hressar - Alda og Ella Stína

Þorrablótsvinnukvöld - 30. og 31.okt

Í kvöld og annað kvöld er mæting í Vegagerðinni.  Hefðbundin undirbúningur þorrablótsins að byrja.  Nefndarkonur mætið og aðrar áhugasamar eruð velkomnar.

Minni á áhöldin, sláturgarn, nálar, skæri og spurning um hanska.

Hafið samband við Brynju Haralds ef þið þurfið upplýsingar.  hs. 4561164 vs. 4502019

Sjáumst !!

24.10.2008

Í dag eru 93 ár síðan Kvenfélagið Sif var stofnað.  Saga félagsins er samfelldur  og órúfanlegur partur mannlífs á Patreksfirði frá stofndegi þess.  Sagan er merkileg og fundargerðarbækur félagsins eru til og vel geymdar.  Þær eru merkileg heimild um félagsstarfið og gefa fundargerðirnar að einhverju leiti vísbendingu um ákveðna þætti mannlífsins á þessum árum.  Hægt er að gera sögu félagsins  mun betri skil og hugsanlega mun það gert á þessum vettvangi þegar fram líða stundir.  Af nógu er að taka. 

Á morgun Fyrsta vetrardag munu Kvenfélagskonur koma saman með sínum gestum  í Sjóræningjahúsinu hér á Patreksfirði. Það er formlega fyrsti vetrarfundur.  Á aðalfundi félagsins 2007 var ákveðið að breyta formi fyrsta fundar sem áður hafði verið spilakvöld til fjölda ára.  Einnig var jólamatur í desember afnuminn, en hefðbundinn mánaðarfundur haldinn samt sem áður.  Eftirleiðis skyldi fyrsti fundur vetrar haldinn með veglegum hætti.  Það hefur nú einu sinni verið gert og mæltist mjög vel fyrir.

Þegar þetta er skrifað hafa margar konur skráð sig með gesti og alls eru um 40 manns komnir á lista sem er mjög vel viðunandi og svipaður fjöldi og í fyrra.

 

Vetrardagskrá 2008/2009

Stjórnin hefur ákveðið vetrardagskrána sem borin var út til félagskvenna en hér kemur bréfið:

Nú þegar vetur gengur í garð þá tökum við höndum saman og mætum hressar og kátar til að takast á við verkefni vetrarins.

Dagskráin hljóðar svo:

     25. október        Skemmtifundur m/ maka eða gesti.

     10. nóvember    Konfektfundur

       6. desember     Bingó hjálparsjóðsins

       8. desember     Laufabrauðsfundur

       3. janúar          Súpufundur

     23. janúar         Þorrablót

       9. febrúar        Skemmtifundur

     22. febrúar        Aðalfundur

      13. mars           Óvissufundur

        4. apríl            Páskabingó

        6. apríl            Kvöldfundur

        9. maí              Lokafundur/ferðafundur.

Allir almennir fundir verða að Bjarkargötu 7, nema að annað sé auglýst, en stærri fundir í félagsheimilinu eins og verið hefur.

Sú nýbreytni verður nú að hafa opið hús á miðvikudögum kl. 16:00 - 18:00 (nánar aulýst síðar).  Þá geta konur mætt skrafað og unnið, því maður er manns gaman.

Með félagskveðju,

Stjórnin.

 

 

Bjarkargata 7, Patreksfirði

Kvenfélagið Sif festi nú síðsumars kaup á íbúðinni í efri hæð hússins við Bjarkargötu 7.  Ætlunin er að hafa þar aðstöðu fyrir félagskonur og fundi.  Allar stærri samkomur verða áfram í Félagsheimili Patreksfjarðar eins og verið hefur eða með öðrum hætti ákveði konur það.

Á fundi sem haldinn var í íbúðinni fyrir skömmu var farið yfir rekstrarkostnað íbúðarinnar og hugmyndir um starfsemina kynntar.  Ætlunin er að úbúa íbúðina til útleigu yfir sumartímann og jafnvel yfir veturinn ef eitthvað kemur til, tekjur af leigunni ættu því að skapast til að mæta kostnaði. Ennfremur var rætt að fram að næsta aðalfundi muni stjórnin sjá um málefni íbúðarinnar og tvær konur valdar til að vinna með stjórn að útfærslu nauðsynlegra breytinga.

Það er hugur í konum og von um að þessi notalega íbúð verði góður vettvangur fyrir félagskonur þar sem hægt verði að vera með ýmsa skemmtilega hluti í gangi.